କଷି ଆମ୍ବ ଆଚାର - Baby Mango Pickle

କଷି ଆମ୍ବ ଆଚାର - Baby Mango Pickle

ପ୍ରସ୍ତୁତି ସାମଗ୍ରୀ-

ଟାକୁଆ ହୋଇ ନଥିବା କଷି  ଆମ୍ବ ୧  କିଲୋ, ମେଥି ୧ ଟେବୁଲ  ଚାମଚ , ସୋରିଷ ୨  ଟେବୁଲ ଚାମଚ , ଲଙ୍କାଗୁଣ୍ଡ ୧ ଚାମଚ ,  ରସୁଣ ୨ଟା, ସୋରିଷ  ତେଲ ୧  କପ , ହଳଦୀ ୧  ଚାମଚ, ଲୁଣ  ପରିମାଣ  ଅନୁଯାଇ  ।

ପ୍ରଣାଳୀ-

ପ୍ରଥମେ  ଆମ୍ବରୁ  ଚୋପା  ଛଡାଇ   ଚାରିଖଣ୍ଡ  କରି  କାଟିବେ ।   ମେଥିକୁ  ଭାଜି  ଗୁଣ୍ଡ  କରି  ରଖିବେ ।  ଏହାପରେ  ମେଥି ଗୁଣ୍ଡ , ସୋରିଷ  ଗୁଣ୍ଡ , ହଳଦୀ , ଲଙ୍କା ଗୁଣ୍ଡ , ରସୁଣ , ତେଲ  ସବୁ  ଭଲ  ଭାବରେ  ମିଶାଇ  ଦେବେ  ।  

ଲୁଣ ଦେଇ  ଏକ  ଜାରରେ  ରଖି  ସବୁଦିନ  ୧ ମାସ  ଯାଏ ଖରାରେ ଶୁଖାନ୍ତୁ ।  ଏହା ଅନେକ ଦିନ ପର୍ଯ୍ୟନ୍ତ ରଖି ଖାଇପାରିବେ ।

ସୁଜି ପିଠା- Suji Pithaa

ସୁଜି ପିଠା-  Suji Pithaa

ଆବଶ୍ୟକ ସାମଗ୍ରୀ: 

    ସୁଜି  ୨୫୦ ଗ୍ରାମ, ବିରି ଡାଲି ୧୫୦ ଗ୍ରାମ , କଞ୍ଚା ଲଙ୍କା ୩/୪ ଟି , ପିଆଜ ୨ଟି, ସୁରିଷ ତେଲ ଓ ଲୁଣ ଆବଶ୍ୟକ  ଅନୁସାରେ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ସୁଜିକୁ ଅଳ୍ପ ପାଣି ଦେଇ କିଛି ସମୟ ଭିଜାଇ ରଖନ୍ତୁ  ।  ବିରିକୁ ଚିକ୍କଣ କରି ବାଟି ଦିଅନ୍ତୁ ।  ଏବେ ସୁଜିରୁ ପାଣି ନିଗାଡି ବିରି ବଟା ସହ ଭଲ ଭାବେ  ମିଶାଇ ଦିଅନ୍ତୁ ।  ଏବେ ତାୱାରେ ତେଲ ଗ୍ରାମ କରି ସରୁ ସରୁ ଚକୁଳି କରନ୍ତୁ ।  ପିଆଜ ଓ  ଲଙ୍କା କୁ  ଚୁନ ଚୁନ କରି କାଟି ଚକୁଳି ଉପରେ ପକାଇ ଅଳ୍ପ ତେଲ ପକାନ୍ତୁ ଯେପରି ମୁସମୁସ ହେବ । 

 ଗରମ ଗରମ ଏବେ ଖାଇବାକୁ ଦିଅନ୍ତୁ  ।

କଦଳୀ ଭଜା ଚାରିକୋଣିଆ – Green Banana Squre size Fry

କଦଳୀ  ଭଜା ଚାରିକୋଣିଆ – Green Banana Squre size Fry

ଆବଶ୍ୟକ ସାମଗ୍ରୀ:

 

କଞ୍ଚା କଦଳୀ – ୨ ଟି, କଞ୍ଚା ଲଙ୍କା – ୩/୪ ଟି , ରିଫାଇନ ତେଲ – ୧ ଚାମଚ, ଭୃସଙ୍ଗ  ପତ୍ର , ଅଦା ଅଳ୍ପ, ବିରି ଡାଲି – ୧ ଚାମଚ, ହଳଦୀ ଓ ଲୁଣ ଆବଶ୍ୟକ  ଅନୁସାରେ , ସୋରିଷ ଅଳ୍ପ , ଲାଲ ଲଙ୍କା ୧ଟି ,  ବୁଟ ଡାଲି  ୧ ଚାମଚ  ।

  

 

ପ୍ରସ୍ତୁତି  ପ୍ରଣାଳୀ  :

           ପ୍ରଥମେ କଞ୍ଚା କଦଳୀ ରୁ  ଚୋପା ଛଡାଇ ତାକୁ ଛୋଟ ଛୋଟ ଚାରିକଣିଆ ଆକାରରେ କାଟି ରଖନ୍ତୁ ।  ଏହାକୁ ହଳଦୀ , ଲୁଣ ଓ ଏକ କପ ପାଣି ଦେଇ ସିଝାନ୍ତୁ  ।  

ଏବେ ଅନ୍ୟ ଏକ କରେଇରେ ତେଲ ଗରମ କରି ବୁଟ , ଲାଲ ଲଙ୍କା ପକାଇ ସୋରିଷ  ଫୁଟାଇ ସେଥିରେ ଭୃସଙ୍ଗ ପତ୍ର, ସିଝା କଦଳୀ, କଟା କଞ୍ଚାଲଙ୍କା ପକାଇ, ଅଦା ପକାଇ ଭଜା ଭାଜି କରି ପରସନ୍ତୁ  ।

ଭେଣ୍ଡି ମସାଲା – Lady’s -finger Masala

ଭେଣ୍ଡି ମସାଲା – Lady’s -finger Masala

ଆବଶ୍ୟକ ସାମଗ୍ରୀ: 

ଭେଣ୍ଡି ୨୫୦ ଗ୍ରାମ, ଟମାଟୋ ୨ଟି , ଲୁଣ ଓ ହଳଦୀ , କଞ୍ଚା ଲଙ୍କା ୫ ଟି , ସୋରିଷ ୧ ଚାମଚ , ପୋସ୍ତ ୧ ଚାମଚ , ନଡିଆ କୋରା ୧/୨ କପ , ରିଫାଇନ ତେଲ ୨ ଚାମଚ  ।    

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଏକ ପାତ୍ରରେ  ଭେଣ୍ଡିକୁ ସଫା କରି  ଛୋଟ ଛୋଟ ଖଣ୍ଡ କରି କାଟି ରଖନ୍ତୁ ।   ଏବେ ନଡିଆ କୋରା, ସୋରିଷ , ପୋସ୍ତ କଞ୍ଚା ଲଙ୍କା ବାଟି ରଖନ୍ତୁ । 

  ଏବେ କରେଇରେ ତେଲ ଗରମ କରି ଭେଣ୍ଡିକୁ ଭଲଭାବେ ଭାଜି ସେଥିରେ  କଟା ଟମାଟୋ ଓ ମସଲା ବଟା ପକାଇ ଭଲ ଭାବେ ଗୋଳାଇ ଦିଅନ୍ତୁ ।  ଏକ କପ ପାଣି ଦେଇ ଫୁଟାଇ ୫ ମିନିଟ ପରେ  ଖାଇବାକୁ ଦିଅନ୍ତୁ ।    

ଆଳୁ ନଡିଆ ଚଡଚଡି – Potato Coconut chadchadi

ଆଳୁ ନଡିଆ ଚଡଚଡି – Potato Coconut chadchadi

ଆବଶ୍ୟକ ସାମଗ୍ରୀ: 

ଆଳୁ  5 ଟି, ଅଦା  ଛୋଟ  ଖଣ୍ଡେ ,  କଞ୍ଚା ଲଙ୍କା ୨ ଟି, ତେଜ ପତ୍ର ୨ ଟି , ଜୀରା ଅଳ୍ପ  , ନଡିଆ କୋରା 1 କପ , ରିଫାଇନ ତେଲ  ୧  ଚାମଚ, ଲୁଣ ଓ ହଳଦୀ ଆବଶ୍ୟକ ଅନୁସାରେ ।  

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଆଳୁକୁ ଧୋଇ ଛୋଟ ଛୋଟ କରି କାଟି ରଖନ୍ତୁ ।  ଅଦା ଓ କଞ୍ଚା ଲଙ୍କା  ଛେଚି ରଖନ୍ତୁ ।  ଏବେ କରେଇରେ ତେଲ ଗରମ କରି ଜୀରା ଓ ତେଜପତ୍ର ଫୁଟାଇ ଆଳୁକୁ  ପକାଇ ଅଳ୍ପ ଭାଜନ୍ତୁ ।  ଆଳୁ ଅଳ୍ପ ଭାଜି ହେଲାପରେ ଏଥିରେ ଲୁଣ, ହଳଦୀ , ଅଳ୍ପ ପାଣି , ନଡିଆକୋରା , ଅଦା , କଞ୍ଚା ଲଙ୍କା ଛେଚା ପକାଇ ଭଲରେ ଗୋଳାଇ ଦିଅନ୍ତୁ ।  ଆଳୁ  ସିଝି ଆସିଲେ ଅଳ୍ପ ଅଳ୍ପ ପାଣି ଥିଲେ ତରକାରୀ ବାହାର କରି  ପରସନ୍ତୁ ।  

କଖାରୁ ଶାଗ ଭଜା – Pumpkin Spinach Fry

କଖାରୁ  ଶାଗ ଭଜା – Pumpkin Spinach Fry

ଆବଶ୍ୟକ ସାମଗ୍ରୀ: 

କଖାରୁ ଶାଗ ଡଙ୍କ -୩/୪ ଖଣ୍ଡ, କଖାରୁ ୨୦୦ ଗ୍ରାମ, ତେଲ ୨ ଚାମଚ , ଫୁଟଣ ୨ ଚାମଚ , କଞ୍ଚା ଲଙ୍କା ୨ ଟି , ଲୁଣ ଆବଶ୍ୟକ ଅନୁସାରେ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ କଖାରୁ  ଡଙ୍କକୁ ଧୋଇ ଛୋଟ ଛୋଟ କରି କାଟି ରଖନ୍ତୁ ।   ପତ୍ର ସବୁକୁ ଚୂନା ଚୂନା କରି କାଟି କାଟି ରଖନ୍ତୁ  ।   କଖାରୁ ବଡ ବଡ କରି କାଟି ରଖନ୍ତୁ ।   ପ୍ରେସର କୁକରରେ  ଅଳ୍ପ ସମୟ ଡଙ୍କ, ପତ୍ର , କଖାରୁ  ଓ ଲୁଣ  ଦେଇ  ସିଝାନ୍ତୁ ।   

ପାଣି ଥିଲେ ଅଧିକ ନିଆଁ ଦେଇ ଶୁଖାନ୍ତୁ  ।   ଏବେ  କରେଇରେ  ତେଲ ପକାଇ ଫୁଟଣ ଫୁଟାନ୍ତୁ । ଏଥିରେ କଟା ଲଙ୍କା ପକାଇ ଫୁଟାନ୍ତୁ ।   ଶାଗକୁ ବଘାରି ଦେଇ ଗରମ ଗରମ ଖାଇବାକୁ ଦିଅନ୍ତୁ ।

ଅମୃତଭଣ୍ଡା ପୋସ୍ତ ତରକାରୀ – Papaya Posta curry

ଅମୃତଭଣ୍ଡା ପୋସ୍ତ ତରକାରୀ – Papaya Posta curry

ଆବଶ୍ୟକ ସାମଗ୍ରୀ: 

ଅମୃତଭଣ୍ଡା ୧ କିଲୋ , ଜୀରା ୧ ଚାମଚ , ରିଫାଇନ ତେଲ ୪ ଚାମଚ , ପୋସ୍ତ ୧ କପ , କଞ୍ଚା ଲଙ୍କା ୧୦ ଟି , ଲୁଣ ଓ ହଳଦୀ ଆବଶ୍ୟକ ଅନୁସାରେ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଅମୃତଭଣ୍ଡା ଚୋପା ଛଡାଇ ପତଳା ଓ ଛୋଟ ଛୋଟ କରି କାଟି ରଖନ୍ତୁ  ।  ପୋସ୍ତ ଓ କଞ୍ଛା ଲଙ୍କା ବାଟି ରଖନ୍ତୁ ।  ଏବେ କରେଇରେ ତେଲ ଦେଇ ଗରମ କରି ଜୀରା ଫୁଟାନ୍ତୁ । ଏବେ ଏଥିରେ କଟା ଅମୃତଭଣ୍ଡା  ପକାଇ ଲୁଣ , ହଳଦୀ ପକାଇ ଭଲଭାବେ ଗୋଳାଇ ଢାଙ୍କୁଣୀ ଦେଇ ସିଝାନ୍ତୁ ।  କମ ନିଆଁରେ ରଖି ଅମୃତଭଣ୍ଡା ସିଝିଗଲା ପର୍ଯ୍ୟନ୍ତ ଅପେକ୍ଷା କରନ୍ତୁ ।  

ଏବେ ଏଥିରେ ପୋସ୍ତ ବଟା ଦେଇ ଗୋଳାଇ ୨ ମିନିଟ ଛାଡି ଦିଅନ୍ତୁ  ।  ଏବେ ଆପଣଙ୍କ  ଅମୃତଭଣ୍ଡା ପୋସ୍ତ ପ୍ରସ୍ତୁତ ।  ଏହା ବହୁତ କମ ଖର୍ଚ୍ଚରେ ଓ କମ ସମୟରେ ହୋଇଥାଏ । 

ମୂଳା ଭୁଜିଆ – Radish Bhujia

ମୂଳା ଭୁଜିଆ – Radish Bhujia

ଆବଶ୍ୟକ ସାମଗ୍ରୀ: 

ସିଝା ହୋଇ ଚକଟା ମୂଳା ୪/୫ ଟି, ଚୂନା ଚୂନା କଟା ପିଆଜ ୨/୩ ଟି , ରସୁଣ ଛେଚା ୧ ଚାମଚ, ଲଙ୍କା, ଧନିଆ  ଓ ହଳଦୀ ଗୁଣ୍ଡ , ଜୀରା , ହେଙ୍ଗୁ , କଟା ଧନିଆ ପତ୍ର ଅଳ୍ପ , ଆବଶ୍ୟକ ଅନୁସାରେ ଲୁଣ ଓ ତେଲ ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଏକ ପ୍ୟାନରେ  ତେଲ ଗରମ କରି ସେଥିରେ ଜୀରା ଫୁଟାନ୍ତୁ ।  ଅଳ୍ପ ହେଙ୍ଗୁ ପକାଇ ପିଆଜ , ରସୁଣ ପକାଇ ଭଲ ଭାବେ କଷି ଦିଅନ୍ତୁ ।   ଏବେ  ସେଥିରେ  ଲୁଣ, ଲଙ୍କା ଗୁଣ୍ଡ, ଧନିଆ ଗୁଣ୍ଡ, ହଳଦୀ ଗୁଣ୍ଡ ମିଶାଇ କିଛି ସମୟ ଭାଜନ୍ତୁ ।  

ଏବେ  ଏଥିରେ ଚକଟା ଯାଇଥିବା ମୂଳା ପକାଇ ତେଲ ଛାଡିବା ପର୍ଯ୍ୟନ୍ତ  ଭାଜନ୍ତୁ ।   ୩/୪ ମିନିଟ ଭାଜିବା ପରେ  ଏଥିରେ ଧଣିଆପତ୍ର ଓ ଆମ୍ଚୁର ଗୁଣ୍ଡ ପକାଇ ଭଲଭାବେ ମିଶାନ୍ତୁ ।  ଏହାକୁ ରୁଟି ବା ପରଟା ସହିତ  ଗରମ ଗରମ ପରସନ୍ତୁ  ।  ଏହା ସୁଆଦିଆ ଓ ପୁଷ୍ଟିକର ମଧ୍ୟ  ।

 

ଆଳୁ ମଟର ଚରଣ – Patato Peas curry

ଆଳୁ ମଟର ଚରଣ – Patato Peas curry

ଆବଶ୍ୟକ ସାମଗ୍ରୀ: 

ମଟର ୨ କପ , କଞ୍ଚା ଲଙ୍କା ୫ଟି, ଆଳୁ ୪ ଟି, ଲୁଣ ଓ ହଳଦୀ ଆବଶ୍ୟକ ଅନୁସାରେ,  ସୋରିଷ ତେଲ ୨ ଚାମଚ, ଫୁଟଣ ୧ ଚାମଚ ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଆଳୁରୁ ଚୋପା ଛଡାଇ ଟିକି ଟିକି ଖଣ୍ଡ କରି କାଟି ରଖନ୍ତୁ ।  କଞ୍ଚା ଲଙ୍କାକୁ ମଧ୍ୟ ଛୋଟ ଛୋଟ କରି କାଟି ରଖନ୍ତୁ ।  ଏବେ ଏକ କରେଇ ଗରମ କରି ସେଥିରେ ତେଲ ଦେଇ ଫୁଟଣ ପକାଇ ଆଳୁ ଓ କଟା କଞ୍ଚା ଲଙ୍କା ପକାନ୍ତୁ ।  ଲୁଣ ଓ ହଳଦୀ ଆବଶ୍ୟକ ଅନୁସାରେ ପକାଇ  ପାଣି ଦିଅନ୍ତୁ ।   ଏହାକୁ ଢାଙ୍କୁଣୀ ଢାଙ୍କି ଦେଇ ସିଝାନ୍ତୁ । 

ଆଳୁ ମଟର ସିଝିଗଲେ ଓ ପାଣି ସୁଖି ଆସିଲେ ଆଞ୍ଚରୁ ବାହାର କରି ରଖନ୍ତୁ । ଏବେ ପ୍ରସ୍ତୁତ ଆପଣଙ୍କ ମନପସନ୍ଦ ଆଳୁ ମଟର ଚରଣ ।   ଏହା ଚଟାପଟ ଓ ଚଟପଟା ମଧ୍ୟ ।

ପନୀର ବଲ – Paneer Ball

ପନୀର  ବଲ – Paneer Ball

ଆବଶ୍ୟକ ସାମଗ୍ରୀ: 

ଆଳୁ ୫୦୦ ଗ୍ରାମ, ୨ ଚାମଚ ଅଦା ଛେଚା , ଅଳ୍ପ କଟା ଲଙ୍କା , ଅଳ୍ପ ଅଟା ଗୁଣ୍ଡ , ଚୂଡା ଗୁଣ୍ଡ  ୧୫୦-୨୦୦ ଗ୍ରାମ ପନୀର, ଧଣିଆପତ୍ର ଅଳ୍ପ ଛୋଟ ଛୋଟ କଟା, ଛାଣିବା ପାଇଁ ତେଲ, ଅଳ୍ପ ଲଙ୍କା, ଗରମ ମସଲା  ଓ ଜୀରା ଗୁଣ୍ଡ ଓ ପାଣି  ଏବଂ ଲୁଣ ଆବଶ୍ୟକ ଅନୁସାରେ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଆଳୁକୁ ସିଝାଇ ଚୋପା ଛଡାଇ ଭଲ ଭାବେ ଚକଟି ଦିଅନ୍ତୁ ।   ଏଥିରେ  ଅଦା ଛେଚା, କଟା ଧଣିଆପତ୍ର, ଅଳ୍ପ ଲୁଣ, ଛୋଟ ଛୋଟ କଟା ଲଙ୍କା, ଜୀରା ଓ ଲଙ୍କା ଗୁଣ୍ଡ,  ଗରମ ମସଲା, ଅଧା ଚୂଡା ଗୁଣ୍ଡ ପକାଇ ଭଲ ଭାବେ ମିଶାଇ ଛୋଟ ଛୋଟ ଗୋଳା ବା ବଲ ପରି କରନ୍ତୁ  ।

ଏବେ ପନୀରକୁ ଛୋଟ ଛୋଟ ଖଣ୍ଡ କରି ଗରମ ମସଲା , କଟା ଲଙ୍କା ଓ ଅଳ୍ପ ଲୁଣରେ ଗୋଳାଇ ରଖନ୍ତୁ । ଏବେ ଗୋଟିଏ ଗୋଟିଏ ଆଳୁ ଗୋଳା ନେଇ ହାତ ପାପୁଲିରେ ଖୋଲି ତା ମଧ୍ୟରେ ପୂର ଦେଲାପରି ପନୀର ଖଣ୍ଡକୁ ରଖି ପୁଣି ଗୋଲ ଗୋଲ କରି ଗଢନ୍ତୁ । ଏହାକୁ ଅଟାରେ ଭଲ ଭାବେ ଗୋଳାଇ ରଖନ୍ତୁ । ଏବେ ଏହି ବଲକୁ  ପାଣିରେ ଅଳ୍ପ ବୁଡାଇ ଚୂଡା ଗୁଣ୍ଡରେ ଗଡାନ୍ତୁ  ଯେପରି ବଲ ଉପରେ ଚୂଡା ଗୁଣ୍ଡ ଭଲ ଭାବେ ଲାଗି ରହିବ ।  ପୁଣି ଅଟାରେ ଗଡାଇ କରି ଚୂଡା ଗୁଣ୍ଡ ଲଗାନ୍ତୁ । ଏବେ ପ୍ରସ୍ତୁତ ପନୀର ବଲ ।   ଏହାକୁ ପ୍ୟାନରେ ତେଲ ଦେଇ  ଭାଜନ୍ତୁ କିମ୍ବା ତେଲରେ ଛାଣି ବାଦାମି ରଙ୍ଗ ହେଲେ କାଡି ରଖନ୍ତୁ ।  ଏହାକୁ ଏହାକୁ ଟମାଟୋ ସସ ସହ ଖାଇବାକୁ ଦିଅନ୍ତୁ ।

ମିଠା ଦହି ଭାତ – Sweet Curd Rice

ମିଠା ଦହି ଭାତ – Sweet Curd Rice

ଆବଶ୍ୟକ ସାମଗ୍ରୀ: 

ଅରୁଆ ଚାଉଳ ୨ କପ, ଦହି ଦେଢ କପ, ଚିନି ଓ ଲୁଣ  ଆବଶ୍ୟକ ଅନୁସାରେ, ଗୋଟା ଜୀରା, ଭୃଶଙ୍ଗ ପତ୍ର , ଶୁଖିଲା ଲଙ୍କା, ଅଳ୍ପ ଧନିଆ ପତ୍ର ଓ ବେଦେନା  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଅରୁଆ ଚାଉଳକୁ ଧୋଇ ଦିଅନ୍ତୁ ।  ଏହାପରେ ଡେକଚିରେ  ଅଳ୍ପ ପାଣି ନେଇ ଗରମ କରନ୍ତୁ । ପାଣି ତାତିଲା ପରେ ଧୋଇ ରଖିଥିବା ଅରୁଆ ଚାଉଳକୁ ସେଥିରେ ପକାଇ  ଭାତ ପ୍ରସ୍ତୁତ କରନ୍ତୁ ।   ଭାତ ହେଇଗଲେ ଭଲଭାବେ ଗାଳି ଅନ୍ୟ ଏକ ପାତ୍ରରେ କାଢି ଥଣ୍ଡା କରନ୍ତୁ  ।  ଥଣ୍ଡା ହୋଇଗଲାପରେ ଏଥିରେ ଆବଶ୍ୟକ ଅନୁସାରେ ଲୁଣ, ଚିନି ଓ ଦହି ମିଶାଇ ଗୋଳାଇ ଦିଅନ୍ତୁ ।  ଏବେ ଏକ କରେଇ ଗରମ କରି ସେଥିରେ ଅଳ୍ପ ଗୁଆ ଘିଅ ପକାଇ ଭଲ ଭାବେ ପାଚିଗଲେ  ଅଳ୍ପ ଜୀରା ଓ ଶୁଖିଲା ଲଙ୍କା ପକାଇ ଫୁଟାନ୍ତୁ ।   ଏହାକୁ ଆଣି ଦହି ଗୋଳା ଭାତରେ ଢାଳି ଦିଅନ୍ତୁ ଓ ଚାମଚରେ ଭଲ ଭାବରେ ମିଶାଇ ଦିଅନ୍ତୁ ।  ଏବେ ସଜାଇବା ପାଇଁ ଏହା ଉପରେ ଧଣିଆପତ୍ର ଓ ବେଦେନା ଦାନାକୁ ପକାଇ ସଜାଇ ଦିଅନ୍ତୁ ।  ଏବେ ପ୍ରସ୍ତୁତ ଆପଙ୍ଗ ଦହି ଭାତ ।   ଏହା ମା ଲକ୍ଷ୍ମୀଙ୍କ ଅତି ପ୍ରିୟ । ମା ଲକ୍ଷ୍ମୀଙ୍କ ପାଖରେ ପ୍ରଥମେ ଭୋଗ ଲଗାଇ ତା ପରେ ପରିବାରକୁ ଖୁଆନ୍ତୁ ।

ସିଝା ନିରାମିଷ ମୋମୋ – Veg steamed Momos

ସିଝା ନିରାମିଷ ମୋମୋ – Veg steamed Momos

ଆବଶ୍ୟକ ସାମଗ୍ରୀ: 

୨ କପ ମଇଦା , ୧ ଚାମଚ ତେଲ, ଭଲଭାବେ ଛୋଟ ଛୋଟ  କଟାଯାଇଥିବା  ପାରିବା (ବନ୍ଧା କୋବି , ଗାଜର , ବିନସ , କ୍ୟାପସିକମ  ) , ପାଣି ଓ ଲୁଣ  ଆବଶ୍ୟକ ଅନୁସାରେ , ଛୋଟ ଛୋଟ କଟା ପିଆଜ ସସ  ଓ ରସୁଣ ୨ ଟି ଲେଖାଏଁ , ସୋୟା ସସ ୩ ଚାମଚ , ଗୋଲ ମରୀଚ ଗୁଣ୍ଡ, ଟମାଟୋ ଓ ଚିଲି ସସ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ମଇଦାକୁ ପାଣି ଦେଇ ଭଲଭାବେ ଚକଟି ୩୦ ମିନିଟ ରଖି ଦିଅନ୍ତୁ ।   ଏବେ ଏକ ପ୍ୟାନରେ ଅଳ୍ପ ତେଲ ଗରମ କରି କଟା ରସୁଣ ପକାଇ ୨-୩ ସେକେଣ୍ଡ ଭାଜନ୍ତୁ  ଓ ପିଆଜ ପକାନ୍ତୁ ।  କିଛି  ସମୟ ପରେ ସବୁ କଟା ପାରିବା ପକାଇ ମଧ୍ୟମ ଆଞ୍ଚରେ ଭାଜନ୍ତୁ ।  ୨-୩ ମିନିଟ ଭାଜି ଏଥିରେ ଲୁଣ,  ସୋୟା ସସ ଓ ଗୋଲ ମରିଚ ଗୁଣ୍ଡ ପକାନ୍ତୁ ।  ୨-୩ ମିନିଟ ଗୋଳାଇବା ପରେ ପିଆଜ ସସ ପକାଇ ଗୋଳାଇ ଦିଅନ୍ତୁ ।  ଏବେ ପ୍ରସ୍ତୁତ ମୋମୋ ମସଲା ।

ଏହାପରେ ମଇଦାକୁ ଛୋଟ ଛୋଟ ଗୋଲା କରି ହାତରେ ଅଳ୍ପ ଓସାରିଆ କରି ଏହାମଝିରେ ମୋମୋ ମସଲା ଦେଇ ମୁହଁ ବନ୍ଦ କରି ରଖନ୍ତୁ  ।  ଏବେ ଏକ ଷ୍ଟିମର ବା ପ୍ରେସର କୁକରରେ  ପାଣି ଫୁଟାଇ ଏଥିରେ ଷ୍ଟିମର ପ୍ୟାନ ବା ଇଡ୍ଲୀ ଛାଞ୍ଚରେ ମୋମୋ ରଖି ଘୋଡାଇ ଦିଅନ୍ତୁ ।   ୫-୬ ମିନିଟ ପରେ  ମୋମୋ ବାହାର କରି ଟମାଟୋ ଓ ଚିଲି ସସ ଦେଇ ପରସନ୍ତୁ ।   ଓ !  କି ସୁଆଦିଆ  ଖାନା ।

କଖାରୁ ସୁପ – Pumpkin Soup

କଖାରୁ ସୁପ  – Pumpkin Soup

ଆବଶ୍ୟକ ସାମଗ୍ରୀ: 

ପାଚିଲା ବୋଇତି କଖାରୁ ୧ କି.ଗ୍ରା, ୨୦ ଗ୍ରାମ ଚିନି, ଲୁଣ ତେଲ ସ୍ଵାଦ  ଅନୁଯାଇ , ରସୁଣ ବଟା ୨୫ ଗ୍ରାମ , ୧୦ ଗ୍ରାମ ଲହୁଣୀ , ଲଙ୍କା ଗୁଣ୍ଡ ଅଳ୍ପ , ଭଜା କଖାରୁ ମଞ୍ଜି କିଛି , ପୁଦିନା ପତ୍ର କିଛି  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ କଖାରୁକୁ ଚୋପା ଛଡାଇ ମଞ୍ଜି ବାହାର କରି ଛୋଟ ଛୋଟ କରି କାଟି ଦିଅନ୍ତୁ ।  ଏଥିରେ ତେଲ ଓ ରସୁଣ ପେଷ୍ଟ ଦେଇ ଭଲ ଭାବରେ ମିଶାନ୍ତୁ ।  ଏବେ ଏଥିରେ କିଛି ଲୁଣ ଓ ଚିନି ଦିଅନ୍ତୁ ।  ଏବେ ପ୍ୟାନ ଗରମ କରି ଏହି କଖାରୁକୁ ୧୦ ମିନିଟ ପର୍ଯ୍ୟନ୍ତ ରୋଷେଇ କରନ୍ତୁ ।  ଏବେ ଏହାକୁ ଥଣ୍ଡା ହେବାକୁ ଛାଡି ଦିଅନ୍ତୁ ।   ଥଣ୍ଡା ହେଲା ପରେ ବ୍ଲେଣ୍ଡିଂ କରି ଓ ଆବଶ୍ୟକ ଅନୁସାରେ ପାଣି ଦେଇ ରଖନ୍ତୁ ।  ଏହାକୁ ଏକ ପ୍ୟାନରେ ଅଳ୍ପ ଗରମ କରି ଏଥିରେ ଲହୁଣୀ ଓ ଲଙ୍କା ଗୁଣ୍ଡ ପକାନ୍ତୁ ।  

ଏବେ ପ୍ରସ୍ତୁତ ଆପଣଙ୍କ କଖାରୁ ସୁପ ।   ଗରମ ଗରମ ସୁପ ବାଢି ଉପରେ କିଛି ଭଜା କଖାରୁ ମଞ୍ଜି ଓ ପୁଦିନା ପତ୍ର ପକାଇ ପରସନ୍ତୁ ।  ଏହା ଖୁବ ସୁଆଦିଆ  ଓ ଶସ୍ତା ମଧ୍ୟ ।  

ଛତୁ ଚମଚମ – Mushroom Chum Chum

ଛତୁ ଚମଚମ – Mushroom Chum Chum

ଆବଶ୍ୟକ ସାମଗ୍ରୀ: 

୧୦୦ ଗ୍ରାମ ଭେଣ୍ଡି, ୨୫୦ ଗ୍ରାମ ଛତୁ, ୧୦ଟି ବିରି ବଡି, ଅଧା କପ ସୋରିଷ ତେଲ, ୧ ଚାମଚ ବଟା ରସୁଣ, ୨ ଚାମଚ ବଟା ସୋରିଷ , ୨ଟି ଛୋଟ ଛୋଟ କଟା କଞ୍ଚା ଲଙ୍କା, ୧/୨ ଚାମଚ ଲଙ୍କା ଗୁଣ୍ଡ, ୧/୨ ଚାମଚ ହଳଦୀ ଗୁଣ୍ଡ, ୨ ଖଣ୍ଡ ଆମ୍ବୁଲ, ଭୃର୍ସଙ୍ଗା ପତ୍ର  ଓ ପାଞ୍ଚ ଫୁଟଣ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ କରେଇରେ ତେଲ ଗରମ କରି ବଡିକୁ ଭାଜି ରଖନ୍ତୁ । ଏବେ ଭେଣ୍ଡିକୁ ବଡ ବଡ ଖଣ୍ଡ କରି କାଟି ଭାଜି ରଖନ୍ତୁ । ଏବେ ଛତୁକୁ ଧୋଇ ଛୋଟ ଛୋଟ ଖଣ୍ଡ କରି କାଟି ଚିପୁଡି ଭାଜି ରଖନ୍ତୁ । ଏହାପରେ କରେଇରେ ଅଳ୍ପ ତେଲ ଦେଇ ଗରମ କରି ପାଞ୍ଚ ଫୁଟଣ ଫୁଟାଇ ଭୃର୍ସଙ୍ଗା ପତ୍ର ଅଳ୍ପ , କଟା କଞ୍ଚା ଲଙ୍କା, ରସୁଣ ବଟା ପକାଇ ଅଳ୍ପ ଭାଜିଲା ପରେ ବଟା ସୋରିଷ, ବଟା ରସୁଣ , ଲଙ୍କା ଗୁଣ୍ଡ ଓ ହଳଦୀ ଗୁଣ୍ଡ ପକାଇ ଅଳ୍ପ ଭାଜି ୨କପ ପାଣି ଦେଇ ଫୁଟାନ୍ତୁ । ପରେ ପାଣି ଫୁଟିଲେ ଏଥିରେ ଭେଣ୍ଡି ପକାଇ ଲୁଣ ଦେଇ କିଛି ସମୟ ଛାଡି ଦିଅନ୍ତୁ । ଏବେ ଏଥିରେ ବଡି, ଆମ୍ବୁଲ, ଛତୁ ପକାଇ ଗୋଳାଇ ୫ -୭ ମିନିଟ ପରେ ଆଞ୍ଚରୁ ବାହାର କରି ନିଅନ୍ତୁ । ଏବେ ପ୍ରସ୍ତୁତ ଆପଣଙ୍କର ଛତୁ ଖଟେଇ ବା ଛତୁ ଚମ ଚମ । ଭାତ ସାଙ୍ଗରେ ଖାଇବାକୁ ଦିଅନ୍ତୁ ।

ଆଳୁ ପନୀର ଚାଟ – Potato Paneer Chaat

ଆଳୁ ପନୀର ଚାଟ – Potato Paneer Chaat

ଆବଶ୍ୟକ ସାମଗ୍ରୀ: 

ପନୀର ୨୦୦ ଗ୍ରାମ, ୧୦-୧୨ ଟି ଛୋଟ ଛୋଟ ଆଳୁ , ୧ କପ ସିଝା ଗ୍ରୀନ ମଟର,  ଖଣ୍ଡେ ଅଦା , ଛୋଟ ଛୋଟ କଟା ୨-୩ ଟି କଞ୍ଚା ଲଙ୍କା, ୨ ଚାମଚ ଆମ୍ବ ଆଚାର, କଳା ମରିଚ ଗୁଣ୍ଡ ଅଧା ଚାମଚ, କାଗିଜି ଲେମ୍ବୁ ରସ ୨ ଚାମଚ , ଧଣିଆ  ପତ୍ର , ଲୁଣ ଓ  ତେଲ ଆବଶ୍ୟକ ଅନୁଯାଇ ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଏକ ନନ-ସ୍ଟିକ ପ୍ୟାନ ନେଇ ତେଲ ଗରମ କରି କଟା କଞ୍ଚା ଲଙ୍କା ଓ ଅଦା ଦେଇ ୧ ମିନିଟ ଭାଜି ନିଅନ୍ତୁ ।  ସମାନ ସାଇଜରେ କଟା ପନୀର ଓ ସିଝା ଆଳୁ ଓ ଗ୍ରୀନ ମଟର ପକାଇ ଆଉ ୧ ମିନିଟ ସନ୍ତୋଳି ଦିଅନ୍ତୁ । ଏବେ ଏଥିରେ ଆମ୍ବ ଆଚାର , କଳା ମରିଚ ଗୁଣ୍ଡ , ଲୁଣ ଓ ଲେମ୍ବୁ ରସ ପକାଇ ଭଲ ଭାବେ ଗୋଳାଇ ଦିଅନ୍ତୁ । 

ଗରମ ଗରମ ପ୍ଳେଟରେ  କାଢି ଉପରେ କଟା  ଧଣିଆ ପକାଇ ପରସନ୍ତୁ । ଏହା ବହୁତ ସ୍ଵାଦିଷ୍ଟ ଓ ପୃଷ୍ଟିକର ମଧ୍ୟ ।

ସବୁଜ ସେଓ ଆଚାର – Green Apple Pickle

ସବୁଜ ସେଓ ଆଚାର – Green Apple Pickle

ଆବଶ୍ୟକ ସାମଗ୍ରୀ: 

ସବୁଜ ସେଓ କଟା ଛୋଟ ଛୋଟ ଖଣ୍ଡ – 3 ଟି , ଆଚାର ମସଲା -୧/୪  କପ  , ତେଲ ୧/୨ ଚାମଚ , ଛୋଟ ଛୋଟ ଖଣ୍ଡ କଟା ଅଦା ଅଳ୍ପ , ରସୁଣ ବଟା -୧/୨ ଚାମଚ , ଚିନି ଗୁଣ୍ଡ ୧/୨ କପ , ଲୁଣ ସ୍ଵାଦ ଅନୁସାରେ , ଭିନେଗାର ୧ ଚାମଚ , କିସମିସ ଅଳ୍ପ , କଞ୍ଚା ଲଙ୍କା ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଏକ ନନଷ୍ଟିକ୍କ ପ୍ୟାନରେ ତେଲ ଦେଇ ଗରମ ହେଲେ ରସୁଣ ବଟା ଓ ଅଦା ଦେଇ ଭାଜନ୍ତୁ ଓ   କମ ଆଞ୍ଚରେ କିଛି ସମୟ ଘାଣ୍ଟନ୍ତୁ  ଯେପରି ମିଶ୍ରଣଟି ଭୁରଭୂରିଆ ହେଇ ଆସିବ । ଏବେ ଚିନି ଗୁଣ୍ଡ ଓ କଟା ସେଓ ପକାଇ ଘାଣ୍ଟନ୍ତୁ  ଯେପରି ଚିନି ତରଳି ମୋଟାଳିଆ ହୋଇ ଆସିବ । ଏବେ ଭିନେଗାର ଓ ଲୁଣ ଦେଇ ୨ ମିନିଟ ଘାଣ୍ଟନ୍ତୁ । 

ଏବେ ଏଥିରେ  ଆଚାର ମସଲା ଦେଇ ଭଲ ଭାବେ ଗୋଳାଇ ଆଞ୍ଚରୁ ବାହାରକୁ ଆଣନ୍ତୁ । ଥଣ୍ଡା କରି ପରସନ୍ତୁ ବା ଡବାରେ ଭରି ରଖନ୍ତୁ ଆପଣଙ୍କ ସ୍ଵାଦିଷ୍ଟ ସେଓ ଆଚାର ।  ଖାଇଲା ବେଳେ ଅଳ୍ପ କଞ୍ଚା ଲଙ୍କା ସହ ଖାଇଲେ ଭଲ ଲାଗେ  ।

ପଣସ ଡାଲି – Jack Fruit Dal Curry

ପଣସ ଡାଲି  – Jack Fruit Dal Curry  

ଆବଶ୍ୟକ ସାମଗ୍ରୀ: 

ଛୋଟ ଛୋଟ ହୋଇ କଟା ପଣସ କଠା  ୨୫୦ ଗ୍ରାମ , ମୁଗ ଡାଲି ୨୦୦ ଗ୍ରାମ , ଟମାଟୋ  ୧ଟି ,  ପାଞ୍ଚ ଫୁଟଣ , ସୁରିଷ ତେଲ , ଅଳ୍ପ ହେଙ୍ଗୁ , ଶୁଖିଲା ଲଙ୍କା ୪ ଟି , ହଳଦୀ ଓ ଲୁଣ ଆବଶ୍ୟକ  ଅନୁସାରେ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଶୁଖିଲା ଡାଳିକୁ ଅଳ୍ପ ଭାଜି ରଖନ୍ତୁ । ଏକ କରେଇରେ ପାଣି ନେଇ ଲୁଣ ହଳଦୀ  ଦେଇ ଡାଳିକୁ ପକାଇ ୫ ମିନିଟ ସିଝାନ୍ତୁ ଓ ଏହାପରେ ଏଥିରେ କଟା ପଣସ ପକାଇ ଘୋଡାଇ ସିଝାନ୍ତୁ । ଯେପରି ଭଲ ଭାବେ ସିଝିବ । ସିଝି ଗଲେ ଏବେ ଏହାକୁ କାଢି ରଖନ୍ତୁ । ଏବେ କରେଇରେ ତେଲଦେଇ ଗରମ ହେଲେ ଗୋଟା ଲଙ୍କା ଓ ପରେ  ଫୁଟଣ ଫୁଟାନ୍ତୁ । ଏଥିରେ ଅଳ୍ପ ହେଙ୍ଗୁ ପକାନ୍ତୁ । ଏଥିରେ କଟା ଟମାଟୋ ପକାଇ ଭାଜନ୍ତୁ , ଏବେ ସିଝା ଡାଲି ଓ କଠାକୁ ପକାଇ ୧ ମିନିଟ ଫୁଟାଇ ଦିଅନ୍ତୁ । 

ଏବେ ପ୍ରସ୍ତୁତ ଆପଙ୍କର ଗରମା ଗରମ ପଣସ ଡାଲି । ଏହାକୁ ପ୍ଲେଟରେ  ବାଢି ଉପରେ କଟା ଧଣିଆ ପତ୍ର ପକାଇ ଭାତ କିମ୍ବା ରୁଟି ସହ ଗରମ ଗରମ ପରସନ୍ତୁ ।

ଗୋଟା ଆଳୁ ଦମ-ଦମ - Small Potato Dam-dam

 ଗୋଟା ଆଳୁ ଦମ-ଦମ - Small Potato Dam-dam

ଆବଶ୍ୟକ ସାମଗ୍ରୀ: 

ଛୋଟ ଗୋଟା ଆଳୁ ୫୦୦ ଗ୍ରାମ, ଟମାଟୋ ସସ  ୬ ଚାମଚ , ଜୀରା , ଧଣିଆ ଓ ପାନ ମଧୁରୀ ଭଜା ପାଉଡର  ୩ ଚାମଚ , ଗରମ ମସଲା ପାଉଡର ଅଧା ଚାମଚ ,୨ଟି  ପିଆଜ ପେଷ୍ଟ , ଅଦା, ଶୁଖିଲା ଲଙ୍କା   ଓ ରସୁଣ ପେଷ୍ଟ ଅଧା କପ , ଧନିଆ ପତ୍ର , ତେଲ ଓ ଲୁଣ ସ୍ଵାଦ ଅନୁସାରେ  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଆଳୁ ଗୋଟା ସିଝାଇ ଚୋପା ଛଡାଇ ଓ ଏହାକୁ  କଣ୍ଟା ଚାମଚ ରେ ଅଳ୍ପ ଅଳ୍ପ କଣା କରି ରଖନ୍ତୁ ।  କରେଇ ଗରମ କରି ତେଲ ଦିଅନ୍ତୁ ଯେପରି ସିଝା ଆଳୁ କୁ ଛାଣି ପାରିହେବ ।  ଗରମ ତେଲରେ ଆଳୁ କୁ ଛାଣି ବାଦାମି ରଙ୍ଗ ହେଲେ କାଢି ରଖନ୍ତୁ । ଅନ୍ୟ ଏକ କରେଇରେ  ଅଳ୍ପ ତେଲ ଦେଇ  ପ୍ରଥମେ  ପିଆଜ ପେଷ୍ଟ କୁ ଭାଜନ୍ତୁ ଓ ପରେ ପିଆଜ ବାଦାମି ରଙ୍ଗ ହୋଇ ଆସିଲେ  ସେଥିରେ ଅଦା, ଶୁଖିଲା ଲଙ୍କା  ଓ ରସୁଣ ପେଷ୍ଟକୁ ଭଲ ଭାବରେ ଭାଜନ୍ତୁ ଯେପରି ମସଲା କଞ୍ଚା ନ ରହେ । ଏଥିରେ  ଟମାଟୋ ସସ ଦେଇ ଅଳ୍ପ ଭାଜନ୍ତୁ । ୨-୩ ମିନିଟ ଭାଜି ହୋଇଗଲେ ସେଥିରେ ଜୀରା, ଧଣିଆ ଓ ପାନ ମଧୁରୀ ଭଜା ପାଉଡର  ଓ  ଗରମ ମସଲା ପାଉଡର ଭଲ ଭାବରେ ୫ ମିନିଟ ଭାଜନ୍ତୁ ।  ମସଲା ଭାଜି ହୋଇଗଲେ ସେଥିରେ ଆଳୁ ପକାଇ ଆସ୍ତେ ଆସ୍ତେ ଧୀର ଆଞ୍ଚରେ କଷନ୍ତୁ ।  ଭଲ ଭାବେ କଷି ହେଲା ପରେ ସେଥିରେ ଅଳ୍ପ ପାଣି ଦେଇ ଫୁଟେଇ ଦିଅନ୍ତୁ  ଯେପରି ଅଧିକ ପାଣି ହେବ ନାହିଁ  । ଏହାକୁ ଏକ ପ୍ଲେଟ ରେ କାଢି ଉପରେ କଟା ଧଣିଆ ପତ୍ର ଦେଇ ପରଶନ୍ତୁ ।  ଏହା ଗରମ ଗରମ ଖୁବ ଭଲ ଲାଗେ ।