ଫୁଟି କାକୁଡି ଆଇସକ୍ରିମ – Yellow Cucumber IceCream

ଫୁଟି କାକୁଡି ଆଇସକ୍ରିମ – Yellow Cucumber IceCream

ପ୍ରସ୍ତୁତି ସାମଗ୍ରୀ-

ଫୁଟି କାକୁଡି ୫୦୦ ଗ୍ରାମ, ମିଲ୍କ ପାଉଡର ୨୫୦ ଗ୍ରାମ, ଚିନି ୨୦୦ ଗ୍ରାମ, ଚେରୀ ୧୫ ଟି, ଗୁଜୁରାତି ୨ଟି    ।   

ପ୍ରଣାଳୀ –

ପ୍ରଥମେ ଫୁଟିକାକୁଡିରୁ  ଚୋପା ଛଡାଇ ମଞ୍ଜି ବାହାର କରି ରଖନ୍ତୁ । ଏହାକୁ ଗ୍ରାଇଣ୍ଡରରେ  ଭଲ ଭାବରେ ଗ୍ରାଇଣ୍ଡ କରି ଏଥିରେ ମିଲ୍କ ପାଉଡର ଓ ଚିନି ପକାଇ ଭଲ ଭାବରେ ଫେଣ୍ଟି ଦିଅନ୍ତୁ । 

ଏବେ ଏହାକୁ ଫ୍ରିଜରେ ରଖି ଥଣ୍ଡା କରି ଗୁଜୁରାତି ଗୁଣ୍ଡ ଅଳ୍ପ ପକାଇ ଆଉଥରେ ଫେଣ୍ଟି ଦିଅନ୍ତୁ ।  

ଏହା ଉପରେ ଚେରୀ କାଟି ସଜାଇ ପରସନ୍ତୁ  ।  ଏହା ଯେପରି ସୁଆଦିଆ ସେପରି ଖାଦ୍ୟ ସାର ଯୁକ୍ତ ମଧ୍ୟ । 

ଅଟକାଳି– Atakali

ଅଟକାଳି– Atakali

ପ୍ରସ୍ତୁତି ସାମଗ୍ରୀ-

 ଅରୁଆ ଚାଉଳ ଚୂନା ୪ କପ, ଅଳ୍ପ ଲୁଣ, ବଡ ନଡିଆ ୧ଟି, ଗୋଲ ମରିଚ ୧୨ଟି, ଗୁଡ ୧ କପ, ଅଳ୍ପ କିସମିସ  ।   

ପ୍ରଣାଳୀ –

ପ୍ରଥମେ ନଡିଆକୁ ଭାଙ୍ଗି ଫାଳେ କୋରି ପାତ୍ରରେ ରଖନ୍ତୁ ।   ଆର ଫାଳ ନଡିଆକୁ ସରୁ ସରୁ କାଟି ଦିଅନ୍ତୁ । ଏବେ କରେଇରେ ୫ କପ ପାଣି ଫୁଟେଇ ସେଥିରେ ଗୁଡ ଓ ଲୁଣ ଦେଇ ଭଲ ଭାବେ ମିଶାଇ ଦିଅନ୍ତୁ ।  ଅନ୍ୟ ୪କପ ପାଣିରେ ଚାଉଳ ଚୂନା ମିଶାଇ ନେଇ ଫୁଟୁଥିବା ପାଣିରେ ଢାଳି ଦିଅନ୍ତୁ।  ନଡିଆ କୋରା ଓ ନଡିଆ ଖଣ୍ଡ  ସେଥିରେ ପକାଇ ଘଣ୍ଟି ଦିଅନ୍ତୁ ।  ୩୦ ମିନିଟ ଘାଣ୍ଟିଲା ପରେ ଆଞ୍ଚରୁ ବାହାର କରି ରଖି ଦିଅନ୍ତୁ ।  ଖାଇବା ବେଳେ ଗୋଲମରିଚ ଗୁଣ୍ଡ ପକାଇ ଥଣ୍ଡା କରି ଉପରେ କିଛି କିସମିସ ପକାଇ ଖାଇବାକୁ ଦିଅନ୍ତୁ ।

ଲସି – Lassi

ଲସି –  Lassi

ପ୍ରସ୍ତୁତି ସାମଗ୍ରୀ-.

୫୦୦ ମି. ଲି. ଖଟା ବସାଦହି, ପାଣି , ମହୁ , ଆଲମଣ୍ଡ  ବାଦାମ ୧୦ ଟି ।

ପ୍ରଣାଳୀ -

ପୂର୍ବରାତିରୁ ଆଲମଣ୍ଡ  ବାଦାମ ୧୦ ଟିକୁ ପାଣିରେ ବତୁରାଇ ରଖନ୍ତୁ ।  ଏହାକୁ ଛୋଟ ଛୋଟ ପତଳା ପତଳା କରି କାଟି ରଖନ୍ତୁ ।  ବ୍ଲେଣ୍ଡରରେ ଦହିକୁ ଭଲଭାବେ ଫେଣ୍ଟି ଦିଅନ୍ତୁ ।  

ଏବେ ଲମ୍ବା ଲମ୍ବା ଗ୍ଲାସରେ ଅଧା ଗ୍ଲାସ ପାଣି ନିଅନ୍ତୁ ଓ ଅଧା ଦହି ନିଅନ୍ତୁ ।  ଏବେ ଏଥିରେ ଏକ ଚାମଚ ମହୁ ପକାଇ ଭଲ ଭାବେ ଚାମଚରେ ଘାଣ୍ଟି ଦିଅନ୍ତୁ । ଉପରେ ବାଦାମ ଖଣ୍ଡ ପକାଇ ପରସନ୍ତୁ ।   ଖରା ଦିନରେ  ଥଣ୍ଡା ପାଣି  ବା ଅଳ୍ପ ବରଫ ଖଣ୍ଡ ପକାଇ ପାରିବେ ।

ଆମ୍ବ ରାବଡି – Mango Rabdi

ଆମ୍ବ ରାବଡି  – Mango Rabdi

ଆବଶ୍ୟକ ସାମଗ୍ରୀ: 

ଅଧା ଲିଟର କ୍ଷୀର, ୪/୫ ଟି ଗୁଜରାତି ଗୁଣ୍ଡ , ୨ କପ  ସଜ କ୍ରୀମ , ୨୫୦ ଗ୍ରାମ  ରାବିଡି, ୧ ଚାମଚ ବେକିଂ ପାଉଡର, ୫୦ ଗ୍ରାମ ବଟର, ୧ କଟା ପାଚିଲା ଆମ୍ବ  , ଅଧା କପ ଚିନି , ୧ ଟି ଜଠିକାଇ ( nutmeg) ପାଉଡର, ଆମ୍ବ ସସ, ୧୫୦ ଗ୍ରାମ ମଇଦା ବା self raising flour, ୧ ୧/୨ ଚାମଚ Vanila Essence, ଅଧା କପ ପାଣି  ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଏକ ପାତ୍ରରେ  ମଇଦା, ବେକିଂ ପାଉଡର , ବଟର, ରାବିଡି ଏକ ଚାମଚରେ ଭଲ ଭାବେ ଗୋଳାଇ ଦିଅନ୍ତୁ । ଏବେ ଏଥିରେ vanilla essence , ପାଣି ଦେଇ ଭଲଭାବେ ମିଶାଇ ରଖନ୍ତୁ ।  ଏହାକୁ ଏକ ପ୍ଲେଟରେ କାଢି ଓଭାନରେ ୨୦୦ ଡିଗ୍ରୀ ରେ ୧୦ ମିନିଟରେ ରଖି  ତା ପରେ ୧୭୫ ଡିଗ୍ରୀ ରେ ୧୫ ମିନିଟ  ରଖି ବେକିଂ କରନ୍ତୁ  । ଏବେ ଏହାକୁ କାଢି ଥଣ୍ଡା କରନ୍ତୁ ।  ଏବେ ଏକ ପ୍ୟାନରେ କ୍ଷୀର ନେଇ  ଫୁଟାଇ  ମାରି ଦିଅନ୍ତୁ ଯେପରି ତିନି ଭାଗରୁ ଭାଗେ ରହିବ ।  ଏବେ  ଏଥିରେ ଚିନି , ଗୁଜରାତି ଗୁଣ୍ଡ ଓ  ଜଠିକାଇ ( nutmeg) ପାଉଡର ପକାଇ ଗୋଳାଇ  ବାହାର କରି ରଖନ୍ତୁ । 

ଏବେ କ୍ରିମରେ ରାବଡି ଆମ୍ବ ସସ  ଭଲ ଭାବେ ମିଶାଇ ଥଣ୍ଡା କରି ରଖନ୍ତୁ ।  ଏବେ ସ୍ପଞ୍ଜ କେକ କୁ ଦୁଇ ପିସ କରି ସ୍ଲାଇସ କରି  ଏଥିରେ ରାବଡି ଢାଳି ଉପରେ ଆମ୍ବ ଖଣ୍ଡ ପକାଇ ଅଳ୍ପ କ୍ରୀମ ମାରି ପୁରା ଥଣ୍ଡା କରି ପରସନ୍ତୁ ।  ଖାଇ କରି କୁହନ୍ତୁ ୱାଓ , ଖୁବ ସୁନ୍ଦର  ଓ ସୁଆଦିଆ ।

ବୁଟ ଡାଲି ପୁରଦିଆ ମଣ୍ଡା ପିଠା– Buta Dal Manda Pitha

ବୁଟ ଡାଲି ପୁରଦିଆ ମଣ୍ଡା ପିଠା– Buta Dal Manda Pitha

ଆବଶ୍ୟକ ସାମଗ୍ରୀ: 

ଅରୁଆ ଚାଉଳ ୧ କି.ଗ୍ରା, , ବୁଟ ଡାଲି ୪୦୦ ଗ୍ରାମ, ଭଲ ଗୁଡ  ୨୦୦ ଗ୍ରାମ , ଅଦା ଖଣ୍ଡେ, ନଡିଆ ୧ଟି , ଗୋଲମରିଚ ୨ ଚାମଚ ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ବୁଟ ଡାଲିକୁ ଭଲ ଭାବେ ଧୋଇ ୨ ଘଣ୍ଟା ବତୁରାଇ ରଖନ୍ତୁ ।  ଅରୁଆ ଚାଉଳକୁ ପାଣି ଛିଞ୍ଚି ଗ୍ରାଇଣ୍ଡର ଗ୍ରାଇଣ୍ଡରରେ ଚୂନା କରି ରଖନ୍ତୁ ।  ବୁଟ ଡାଲିକୁ ସିଝାଇ ରଖନ୍ତୁ । ନଡିଆ କୋରି କରି ରଖନ୍ତୁ । ଏବେ ବୁଟ ଡାଲିକୁ ଅଧା ଚକଟି ନଡିଆ କୋରା, ଅଦା ବଟା, ଗୁଲମରିଚ ଗୁଣ୍ଡ ଓ ଗୁଡ ପକାଇ ଭଲଭାବେ ମିଶାଇ ଦିଅନ୍ତୁ । ଏହାପରେ ଚାଉଳ ଚୂନାକୁ ଖଳି କରି ଏହାକୁ ଗୋଲ ଗୋଲ କରି ମଣ୍ଡା ପରି ଗଢି ସେଥିରେ ବୁଟ ଡାଲି ମିଶ୍ରଣକୁ ପୁର ଦେଇ ବନ୍ଦ କରି ଦିଅନ୍ତୁ । ଏବେ ମଣ୍ଡାକୁ ଇଡ୍ଲୀ ଛାଞ୍ଚରେ ସିଝାଇ ଦିଅନ୍ତୁ । ଏବେ ପ୍ରସ୍ତୁତ ଆପଣଙ୍କ ବୁଟ ଡାଲି ପୁରଦିଆ ମଣ୍ଡାପିଠା । 

ଲୁଣି ପୋଡପିଠା – Salty Whole Cake (luni podapithaa)

ଲୁଣି ପୋଡପିଠା – Salty Whole Cake (podapithaa)

ଆବଶ୍ୟକ ସାମଗ୍ରୀ:

ଅରୁଆ ଚାଉଳ ୨ କି.ଗ୍ରା., ତେଜପତ୍ର  ୪ ଟି, ନଡିଆ ୨ଟି, ଅଦା ଖଣ୍ଡେ , ଗୋଲମରିଚ ୧୫ଟି , ଘିଅ ୨୦୦ ଗ୍ରାମ, ଲୁଣ ସ୍ଵାଦ ଅନୁସାରେ ।

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଅରୁଆ ଚାଉଳକୁ ଗୁଣ୍ଡକରି ରଖନ୍ତୁ ।  ନଡିଆ ୧ଟି କୋରି କରି ରଖନ୍ତୁ । ଆଉ ଗୋଟେ ନଡିଆ ନେଇ ସରୁ ସରୁ କାଟି ଖଣ୍ଡ କରି ରଖନ୍ତୁ । ଏବେ ଗୋଟିଏ ଡେକଚିରେ ୬ ଗ୍ଲାସ ପାଣି ନେଇ ଫୁଟାଇ ଦିଅନ୍ତୁ ଓ ଏଥିରେ ଚୂନା ପକାଇ ଖଳି ଜନ୍ତି ଦିଅନ୍ତୁ । ଏବେ ଏଥିରେ କଟା ନଡିଆ, ଗୋଲ ମରିଚ ଗୁଣ୍ଡ , ତେଜପତ୍ର ଓ କଟା ଅଦା ପକାଇ ଭଲ ଭାବେ ମିଶାଇ ଦିଅନ୍ତୁ । ଏହି ମିଶ୍ରଣକୁ ଥାଳିରେ କାଢି ଭଲଭାବେ ଚକଟି ଦିଅନ୍ତୁ । ଅନ୍ୟ ଏକ କରେଇରେ କଦଳିପତ୍ର ଦେଇ ଘିଅ ମାରି ଦେବେ ଓ ଖଳିକୁ ଦେଇ ପୁଣି କଦଳୀ ପତ୍ର ଦେଇ ଦିଅନ୍ତୁ । କଦଳୀ ପତ୍ର ଉପରେ ନିଆଁ ଥାଇ ଅଙ୍ଗାର କିମ୍ବା ଘଷି ଦିଅନ୍ତୁ । ଏହାକୁ କମ ଆଞ୍ଚରେ ୨ ଘଣ୍ଟା ଚୂଲିରେ ବସାଇବେ । ଏହାପରେ କଦଳୀ ପତ୍ର କାଢି ସଫା କରି ମୋଟା ମୋଟା ସ୍ଲାଇସ ବା ଖଣ୍ଡ କରି ଖାଇବାକୁ ଦିଅନ୍ତୁ । 

ଏବେ ପ୍ରସ୍ତୁତ ଆପଣଙ୍କ ଗରମା ଗରମ ଲୁଣି ସ୍ଵାଦଯୁକ୍ତ ପୋଡ ପିଠା । ଏହା ଖାଇବାକୁ ବହୁତ ଭଲଲାଗେ । 

ଚାଉଳ ବୁନ୍ଦି ଖିରି – Rice-Boondi Kheer

ଚାଉଳ ବୁନ୍ଦି ଖିରି – Rice-Boondi Kheer

ଆବଶ୍ୟକ ସାମଗ୍ରୀ :

ଚାଉଳ ୧୦୦ ଗ୍ରାମ, କାଜୁ କିସମିସ -୫୦ ଗ୍ରାମ, କ୍ଷୀର-୫୦୦ ମି. ଲି. , ଗୁଜୁରାତି – ୩ ଟି, ଚିନି -୧୦୦ ଗ୍ରାମ , ତେଜ ପାତ୍ର -୨/୩ ଟି, ଲୁଣ ସ୍ଵାଦ ଅନୁସାରେ । 

ପ୍ରସ୍ତୁତି  ପ୍ରଣାଳୀ  :

ପ୍ରଥମେ ଚାଉଳକୁ ଚିକ୍କଣ କରି ଭଲ ଭାବେ ବାଟି ରଖନ୍ତୁ ।  ଏଥିରେ ଲୁଣ ପକାଇ ଭଲ କରି ଗୋଳାଇ ଏହାକୁ ବୁନ୍ଦି ଛଣା ଜାଲି ଚଟୁରେ  ବୁନ୍ଦି ଛାଣି ରଖନ୍ତୁ । ଏବେ ଚିନି, କ୍ଷୀର, ଭଜା କାଜୁ ଓ କିସମିସ ଏବଂ ତେଜପତ୍ର ଫୁଟାଇ ଦିଅନ୍ତୁ । ଏଥିରେ ଚାଉଳ ଛଣା ବୁନ୍ଦି ପକାଇ ଫୁଟାନ୍ତୁ । ଶେଷରେ ଗୁଜୁରାତି ପକାନ୍ତୁ । ଥଣ୍ଡା ବା ଉଷୁମ ଉଷୁମ ଖାଇବାକୁ ଦେଇ ପାରନ୍ତି । 

ସିଝା ସନ୍ଦେଶ – Steamed Sandesh

ସିଝା ସନ୍ଦେଶ – Steamed Sandesh

ପ୍ରସ୍ତୁତି  ସାମଗ୍ରୀ :

ଛେନା ୨୫୦ ଗ୍ରାମ , ଚିନି ୧୫୦ ଗ୍ରାମ , ଗୁଜୁରାତି ୨ ଗ୍ରାମ , ମଇଦା ୨୫ ଗ୍ରାମ , ଘିଅ ୫୦ ଗ୍ରାମ ।

ପ୍ରଣାଳୀ  :

ଛେନାକୁ ପ୍ରଥମେ ଏକ କପଡ଼ାରେ  ବାନ୍ଧି ପାଣିତକ ବାହାର କରି ରଖନ୍ତୁ ।  ଏହାପରେ ଛେନା , ଚିନି , ଘିଅ , ମଇଦା ଓ ଗୁଜୁରାତି ଗୁଣ୍ଡକୁ  ମିଶାଇ ଭଲ ଭାବରେ ଚକଟି ଦିଅନ୍ତୁ । ଚକଟି ସାରିଲା ପରେ ଏକ ପାତ୍ରରେ ଘିଅ ମାରି ଏହି ମିଶ୍ରଣକୁ ରଖନ୍ତୁ । 

ଏହାପରେ ପ୍ରେସର କୁକରରେ ଅଳ୍ପ ପାଣି ଦେଇ ଏହି ପାତ୍ରଟିକୁ ରଖି ଷ୍ଟିମ କରାଇବେ । ମିଶ୍ରଣଟି ବସିଗଲା ପରେ ଥଣ୍ଡା କରି ରଖନ୍ତୁ ।  ଥଣ୍ଡା ହେଲା ପରେ ଏହାକୁ ଖଣ୍ଡ ଖଣ୍ଡ କରି କାଟି ରଖନ୍ତୁ । ଏବେ ପପ୍ରସ୍ତୁତ ଆପଣଙ୍କ ମନ ପସନ୍ଦର ମିଠା ସନ୍ଦେଶ । 

ଚିତ୍ରକୁଟ – Chitrakut

ଚିତ୍ରକୁଟ – Chitrakut

ପ୍ରସ୍ତୁତି  ସାମଗ୍ରୀ – 

ଦୁଧ ଛେନା – ୨୫୦ ଗ୍ରାମ , ଚିନି – ୧୦୦ ଗ୍ରାମ , ଖୁଆ – ୫୦ ଗ୍ରାମ , ବେକିଂ ପାଉଡର -୫ ଗ୍ରାମ , ମଇଦା – ୨୫ ଗ୍ରାମ, ରିଫାଇନ ତେଲ – ୫୦୦ ଗ୍ରାମ, ଗୁଜରାତି – ୫ ଗ୍ରାମ ।

ପ୍ରଣାଳୀ –

ପ୍ରଥମେ ଛେନାରୁ ପାଣି ଭଲଭାବେ ଛଡାଇ ରଖନ୍ତୁ ।  ଛେନାରେ ମଇଦା , ଖୁଆ , ଗୁଜରାତି ଓ ବେକିଂ ପାଉଡର ପକାଇ ଭଲଭାବେ ମିଶାଇ ଦିଅନ୍ତୁ । ଏହି ମିଶ୍ରଣକୁ ଭଲ ଭାବେ ଚକଟି ଦିଅନ୍ତୁ ।  ଏହାପରେ ଏହି ମିଶ୍ରଣକୁ ଏକ ପ୍ଲେଟରେ ଭଲଭାବେ ଚାପି ଚାପି ରଖନ୍ତୁ ଯେପରି ଖଣ୍ଡ ଖଣ୍ଡ କରି କାଟି ହେବ । ଏହାକୁ ଛୁଟ ଛୁଟ ଖଣ୍ଡ କରି କାଟନ୍ତୁ ।  ଚିନିରେ ପାଣି ମିଶାଇ ସିରା ପ୍ରସ୍ତୁତ କରନ୍ତୁ ।  ଅନ୍ୟ ଏକ କରେଇରେ  ତେଲ ଦେଇ ଗରମ କରନ୍ତୁ ।  ତେଲ ଭଲ ଭାବେ ଗରମ ହେଲେ ଏଥିରେ ଖଣ୍ଡ ଖଣ୍ଡ ଛେନା ମିଶ୍ରଣକୁ ପକାଇ ବାଦାମି ରଙ୍ଗ ପର୍ଯ୍ୟନ୍ତ ଛାଣି ତାକୁ କ୍ଷୀର ମଧ୍ୟରେ ପକାଇ ଦିଅନ୍ତୁ ।  କିଛି ସମୟ ଛାଡି ଦିଅନ୍ତୁ ।  ଏବେ ପ୍ରସ୍ତୁତ ଆପଣଙ୍କ ପ୍ରିୟ ଚିତ୍ରକୁଟ ମିଠା ।  ଏବେ ସ୍ଵାଦ ନିଅନ୍ତୁ ଓ ଅନ୍ୟକୁ ଦିଅନ୍ତୁ ।  ନିଶ୍ଚିତ କହିବେ ଆଃ କି ସ୍ଵାଦିଷ୍ଟ  !